ក្លឹបបាល់ទះវិសាខាកំពុង​ជ្រើ​សរើស​កីឡាករ​វ័យក្មេង​​​ចូលក្រុម​បន្ថែម

890

ភ្នំពេញៈ ក្លឹប​កីឡា​បាល់ទះ​វិសាខា​បាន​ ​ជូន​ដំណឹង​ដល់​យុវជន ​ដែល​ស្រលាញ់​វិស័យ​កីឡា​បាល់​ទះ ថា ក្លឹប​កំពុង​ត្រូវ​ការ​ជ្រើស​រើស​យុវជន ដែល​មាន​អាយុក្រោម​ ១៣ ដើម្បី​ចូលរួម​ក្នុង​ក្រុមហាត់​​លេង​ផ្នែក ប៉ះសេប៉ាល់ (លើក​ប៉ាល់)។

ក្លឹប​​វិសាខា​បាន​ចេញ​សេច​ក្ដី​ប្រកាស​មួយ​ ដែល​ធ្វើ​ឲ្យ​មាន​ការ​ចាប់អារម្មណ៍​ទាក់​ទង​រឿង​ក្លឹប​ជ្រើស​រើស​កីឡាករ​​ថ្មី​ដែល​មាន​កម្ពស់​ចាប់​ពី​ ១,៧៥​ ម៉ែត្រ​ឡើង ដោយ​កំណត់​អាយុ​​​មិន​ឲ្យ​លើស​ ១៣ឆ្នាំឡើយ ។

​លោក សាន​ ​សុក្រិត ​គ្រូ​បង្វឹកកីឡា​បាល់ទះ​ក្រុម​វិសាខា​បាន​​​ឲ្យ​ដឹង​ថា «លក្ខខណ្ឌជ្រើ​រើស​​នេះ ​គឺ​រើស​តែ​ ២​នាក់​ប៉ុណ្ណោះ ដោយ​កីឡាករ​ទាំង​ពីរ​នាក់​​នោះ​​យក​មក​បង្ហាត់​​ជា​អ្នក​​ប៉ះ​សេ​ (លើក​បាល់​) ។ ជាង​នេះ​ទៅ​ទៀត​គឺ​រើស​យក​អ្នក​មិន​ចេះ​លេង​បាល់​​សោះ​​តែ​ម្ដង»។

​លោក​បញ្ជាក់​ទៀត​ថា ​ការ​កំណត់​នេះ​ នឹង​អាច​មាន​ការ​បន្ធូរបន្ថយ​ បើ​​សិន​​មិន​អាច​​ស្វែង​រក​​បាន។ ​បើ​គិត​មក​ដល់​ពេល​នេះ​មាន​ក្មេង​ម្នាក់​ ​ដែល​មាន​ដើម​កំណើត​នៅ​ខេត្ត​កំពត ​មាន​កម្ពស់ ១,៧៣ ​​ម៉ែត្រ​​មាន​​អាយុ ១៣ ឆ្នាំ​​បាន​ដាក់​ពាក្យ​ចង់​ចូល​រួម​​។ ប៉ុន្តែ​កម្រិត​អាយុ​នេះ​​ ​​កំពុង​ខុស​គោលការណ៍ ប៉ុន្តែ​នឹង​អាច​យក​ក្មេង​នេះ​ ប្រសិន​បើ​រក​​តាម​គោលការណ៍​មិន​បាន។

​មួយ​វិញ​ទៀត ក្មេង​​ត្រូវ​តាម​លក្ខខណ្ឌ ហើយ​ចូលរួម​ហាត់​បាល់ទះ​នេះ​ក្លឹប​វិសាខា​​ នឹង​បង្វឹក​ដើម្បី​ត្រៀម​ស៊ីហ្គេម​ឆ្នាំ​២០២៣ ​ជាង​នេះ​ទៅ​ទៀត​ក៏​អាច​នឹង​បញ្ជូន​ទៅ​ហាត់​នៅ​ក្រៅ​ប្រទេស​ទៀត​ផង។

​រហូត​មក​ដល់​ថ្ងៃទី ៣០ ខែ​មករា ទីបំផុត ក្លឹប​បាល់ទះ​វិសាខាបាន​​ជ្រើស​រើស​ បាន​យុវជន​ម្នាក់ ​​ឈ្មោះ កែវ លេង​លី​ហ៊ួ ​មាន​កម្ពស់ ១,៧៨ ម៉ែត្រ​ ហើយ​ទើប​តែ​មាន​អាយុ ១៣ ឆ្នាំ​ប៉ុណ្ណោះ ដើម្បី​​ចូល​ហ្វឹកហាត់​ជា​អ្នក​លើក​បាល់​​ (ប៉ះសេ) ហើយ​។

Lyhour Visakha Volleyball Club just recruited.

​លោក​ សុក្រិត ឲ្យ​ដឹង​ថា​ ក្មេង​ខាង​លើ​មក​ពី​ខេត្ត​កំពត ទើប​តែ​​ចូល​ហាត់​បាន​ ១៣ ថ្ងៃ​ប៉ុណ្ណោះ។ លីហ៊ួ នឹង​​ហាត់​ជា​អ្នក​ប៉ះ​សេ របស់​ក្លឹប​វិសាខា និង​ក៏​ជា​ទំពាំង​ស្នង​ឫស្សី​មួយ​រូប​របស់​កម្ពុជា​ក្នុង​វិស័យ​បាល់ទះ​ផង​ដែរ។

​​​គ្រូ​បង្វឹក​រូប​នេះ​​បន្ថែម​ថា ក្រោយ​ចូល​ឆ្នាំ​ចិន នឹង​មាន​ក្មេង​ម្នាក់​ទៀត​មក​ពី​ល្វាឯម​ខេត្ត​កណ្ដាល​ ​មក​​ធ្វើតេស្ត​ជា​មួយ​ក្លឹប​​វិសាខា។ តាម​ព័ត៌មាន​​​បញ្ជូន​មក​កាន់​ក្លឹប​​ក្មេង​នោះ​​មាន​កម្ពស់​​ប្រហាក់​ប្រហែល​ នឹង កែវ លេង​លីហ៊ួ ដែរ ហើយ​មាន​អាយុ​ប្រហាក់​ប្រហែល​គ្នា​ទៀត​ផង។

​ការ​ជ្រើស​រើស​នេះ​ នឹង​បញ្ចប់​ក្រោយ​ពេល​រើស​បាន​គ្រប់​ចំនួន​២​រូប ដែល​សម្រាប់​ហ្វឹកហាត់​ជា​អ្នក​​លើក​បាល់។ សម្រាប់ កែវ លេង​លីហ៊ួ នឹង​ឈាន​ចូល​វ័យ​១៤​ឆ្នាំ​នា​ខែ​តុលា ឆ្នាំ​២០១៩ ៕

Loading...