សង្វៀន​ថោន​​ផ្គូផ្គង​កីឡាករ​វ័យ​ក្មេង​ប្រកួត​ដណ្ដើម​ប្រាក់​លាន​​បង្ហាញ​ទេពកោសល​កីឡាករ​ជើង​ថ្មី​

148

ភ្នំពេញៈ ព្រឹត្ដិការណ៍ ប្រកួត​ដណ្តើម​ប្រាក់​រង្វាន់ចំនួន ​៣លាន​៤​សែន​រៀល ​ប្រចាំ​សប្តាហ៍​ នៅ​សង្វៀន​ទូរទស្សន៍​ថោន​នា​យប់​ថ្ងៃ​អាទិត្យ ​ទី​៨ ​ខែ​វិច្ឆិកា​ ឆ្នាំ​​នេះ​បាន​​ផ្តល់​ជូន​កីឡាករ​ជើង​ថ្មី​មាន​បទ​ពិសោធន៍​ខ្ចី​វស្សា​ក្នុង​ប្រ​ភេទ​ទម្ងន់ ​៥៧​ គីឡូក្រាម ​ប៉ុន្តែ​ទឹក​ចិត្ត​ប្រ​កួត​ចូល​វាយ​សម្រុក​ខ្លាំងៗ​ អស់​ពី​សមត្ថភាព​​ធ្វើ​ឲ្យ​អ្នក​ទស្សនា​និយម​ចូល​ចិត្ត​និង​កន្ត្រាក់​អារម្មណ៍​។​ជា​មួយ​គ្នា​នេះ ​តាម​រយៈ​កិច្ច​សម្ភាស​ជា​មួយ​គណៈ​កម្មការ​រៀប​ចំ​ផ្គូ​ផ្គង​បាន​បង្ហើប​ឲ្យ​ដឹង​ថា​ ​គឺ​ការ​ប្រកួត​នេះ ​គឺ​ជា​របត់​ថ្មី​ក្នុង​ការ​កត់​សម្គាល់​​ពី​​សមត្ថភាព​របស់​កីឡាករ​ថ្មី​ៗ​មួយ​ចំនួន ដោយ​ការ​​ប្រ​កួត​មាន​ភាព​ទាក់​ទាញ​ល្អ​ជាង​ជើង​ចាស់​មួយ​ចំនួន​។​

បន្ថែម​ពី​លើក​នេះ​ទៀត ​ការ​ផ្តល់​ឱកាស​ជូន​កីឡាករ​ជើង​ថ្មី​ថ្មោង​ជា​គុន​ខ្មែរ​ពន្លក​ថ្មី ​គឺ​ជា​ការ​លើក​ស្ទួយ​និង​ផ្តល់​ឱកាស​ឲ្យ​ពួក​គាត់​កាន់​តែ​ល្អ​ប្រ​សើរ​ឈាន​ទៅ​ជា​អ្នក​ប្រដាល់​ដែល​ឆ្នើម​ឡើង​ជា​បន្ត​បន្ទាប់​។ ​សមាស​ភាព​អ្នក​ប្រដាល់​ទាំង​ ៤​ មាន ​អេលីត ​ដេង​ហួរ ​មក​ពី​នាយក​ដ្ឋាន​​អង្គរក្ស​, ពេជ្រ​ កក្កដា ​មក​ពី​ចកនា​យុវជន ​១៥៧គុន​ខ្មែរ​, ធន់​ ផានិត ​មក​ពី​ខេមរ​ភូមិន្ទ​ និង​បាន​លីម​បញ្ជាការ​ដ្ឋាន​ទ័ព​ពិសេស​ក្នុង​ប្រ​ភេទ​ទម្ងន់​ ៥៧ ​គីឡូគ្រាម​។​

លោក​ ជួប ​វុត្ថា ​ផលិត​ករ ​និង​ជា​អ្នក​គ្រប់​គ្រង​សមាសភាព​កីឡាករ​កម្ម​វិធី​ប្រ​ដាល់​នៅ​សង្វៀន​ថោន​បាន​ឲ្យ​ដឹង​ថា​ ​ការ​ផ្តល់​ឱកាស​សម្រាប់​កីឡាករ​ឆ្នើម​ៗ​វ័យ​ក្មេង​មាន​បទ​ពិសោធ​ន៍​នៅ​ខ្ចី​វស្សា​ ប៉ុន្តែ​ការ​ប្រ​កួត​វាយ​អស់​ពី​សមត្ថភាព​ព្រម​ទាំង​មាន​ភាព​ទាក់​ទាញ​មហា​ជន​ខ្លាំង​ផង​ដែរ​។

​បន្ថែម​លើស​ពី​នេះ ​ក៍​ជា​ទស្សនៈ​វិស័យ​មួយ​ជួយ​គាំ​ទ្រ​និង​បណ្តុះ​បណ្តាល​អ្នក​ប្រដាល់​ដែល​លេច​ធ្លោ​ជំនាន់​ក្រោយ​ឈាន​ទៅ​ជា​អ្នក​ប្រដាល់​លំដាប់​ខ្លាំង​ជួរ​មុខ​ផង​ដែរ​។​ លោក​ ជួប​ វុត្ថា​ បន្ថែម​ថា៖«​ទោះ​ជា​មាន​ការរិះ​គន់​ខ្លះ ​ប៉ុន្តែ​តាម​បទ​ពិសោធ​របស់​ខ្ញុំ​រយៈ​ពេល​មួយ​ឆ្នាំ​លើ​ផ្នែក​ប្រដាល់​នេះ​ខ្ញុំ​គិត​ថា​គួរតែ​ផ្តល់​ឱកាស​សម្រាប់​កីឡាករ​វ័យ​ក្មេង​ជា​ពន្លក​គុន​ខ្មែរ​ដើម្បី​ ផលិត​បាន​នូវ​កីឡាករ​គុន​ខ្មែរ​ឲ្យ​សម្បូរ​បែប​ឆ្លើយ​តប​ទៅ​នឹង​សេចក្តី​ត្រូវ​ការ​ប្រ​កួត​ដ៍​ច្រើន»​។ ​លោក​បាន​បញ្ជាក់​ថា​ ​កីឡាករ​ជើង​ចាស់​ល្បី​មួយ​ចំនួន​ចាប់​ផ្តើម​សម្តែង​ឬក​ផង​ប្រ​កួត​មិន​​សូវ​ទាក់​ទាញ​ផង​។​

ទាក់​ទង​ទៅ​នឹង​សមត្ថភាព ​និង​បទ​ពិសោធន៍​បច្ចេក​ទេស​​វិញ​នៅ​ក្នុង​កីឡាករ​វ័យ​ក្មេង​ទាំង ​៤ ​នាក់ ​ត្រូវ​បាន​គេ​កត់​សម្គាល់​ឃើញ​ថា​កីឡាករ​ ពេជ្រ ​កក្កដា​ កូន​សិស្ស​លោក ​ពេជ្រ​ សុផាន់ ​មាន​ក្បាច់​គួរ​ចាប់​អារម្មណ៍​ ហើយ​កីឡាករ​ ធន ​ផានិត​ កូន​សិស្ស​ លោក ​ធន​ សុភា​ មាន​ទឹក​ចិត្ត​ប្រ​កួត​ពុះ​កញ្ជ្រោល​ចូល​វាយ​សម្រុក​មិន​បន្ធូរ​ដៃ​ព្រម​ទាំង​ទំនង​មាន​ប្រៀប​ជាង​គេ​បន្តិច​បន្តួច​ខណៈ​ដែល​ ធន​ ផានិត​មាន​​ប្រ​វត្តិ​ចាញ់​តែ​ម្តង​គត់​ហើយ​សូម្បី​តែ​ជើង​ខ្លាំង ​រិន​ ដេវីដ ​ក៍​លំបាក​យក​ឈ្នះ​គេ​ណាស់​។​

យ៉ាង​ណា​ក៍​ដោយ​សម្រាប់​ អេលីត​ សេង​ហួរ​ កូន​សិស្ស ស៊ន​ អេលីត​ និង​ លឹម ​បាន ​​កូន​សិស្ស​លោក ​ហង្ស​ សឿន​ មាន​មតិ​ភាគ​ច្រើន​សុទ្ធ​​តែ​មិន​ហ៊ាន​ទស្សន៍​ទាយ​មុន​ប្រ​កួត​បាន​ឡើយ​ពី​ព្រោះ​សុទ្ធ​តែ​ប្រ​ភេទ​កីឡា​ចូល​វាយ​សម្រុក​មិន​សូវ​មាន​ស្នៀត​ការ​ពារ​ពោល​ គឺ​អាច​ចូល​គោល​ដៅ​ល្អ​សន្លប់​ភ្លាមៗ​ក៍​ថា​បាន​។

ងាក​មក​មើល​ពី​ស្ថិតិ​ឬ​ប្រ​វត្តិ​ប្រ​កួត​របស់​ពួក​គេ​ទាំង​ ៤ ​កីឡាករ​ ធន់ ​ផានិត​ ធ្លាប់​ប្រ​កួត​បាន​ចំនួន​តែ ​១៤​ លើក​ឈ្នះ ​១៣ ​លើក​ចាញ់​១​លើក​មាន​កម្ពស់​ ១,៧១​ ម៉ែត្រ​។​ កីឡាករ​ ពេជ្រ​ កក្កដា ​ធ្លាប់​ប្រ​កួត​បាន​ចំនួន ២​៥​ លើក​ឈ្នះ ​១៦ ​លើក​ចាញ់​ចំនួន ​៨​ លើក​ស្មើ​១​លើក​។ ​កីឡាករ​ បាន​ លីម​ ប្រ​កួត​បាន​ចំនួន​២៣​លើក​ឈ្នះ ​១៧ លើក​ចាញ់​ ៦​ លើក​ស្មើ​គ្មាន​។​ ចំណែក ​កីឡាករ​ អេលីត ​សេង​ហួរ ​ប្រ​កួត​​បាន​ចំនួន​ ៣២ ​លើក​នឈ្នះ​ ២៣​លើក​ចាញ់​៧​លើក​ស្មើ​២​លើក​។​

តាម​រយៈ​ការ​សម្ភាស​ជា​មួយ​គ្រូ​បង្វឹក​លោក​ធន​សុភា​ដែល​ជា​គ្រូ​របស់​កីឡាករ​ ធន់ ​ផានិត​​ និយាយ​ថា​៖«ខ្ញុំ​មាន​ជំនឿ​មុត​មាំ​ថា​ ​កូន​សិស្ស​របស់ ​ខ្ញុំ​ឈ្នះ​ប្រាក់​លាន​នៅ​សប្តាហ៍​នេះ​ពី​ព្រោះ​ហ្វឹក​ហាត់​បាន​ល្អ​ណាស់​ពិសេស​ដៃ​គូ​ប្រ​កួត​មាន​កម្រិត​សមត្ថភាព​ប្រ​ហាក់​ប្រ​ហែល​គ្នា​ និង​​មាន​ដៃ​គូ​ខ្លះ​ទំនង​ក្រោម​យើង​បន្តិច​បន្តួច​ដែរ»​។

លោក​បន្តថា បាន​​សង្ឃឹម​ជឿជាក់​ ៩០ ​ភាគរយថា កូន​សិស្ស​លោក​ឈ្នះ​ប្រាក់​លាន​។​ លោក ​ពេជ្រ ​សុផាន់ ​គ្រូ​បង្វឹក​របស់​ ពេជ្រ​ កក្កដា​និយាយ​ថា​ ​លោកមាន​ទំនុក​ចិត្ត​ថា ​កូន​សិស្ស​លោក​​នឹង​ឡើង​ដល់​វគ្គ​ផ្តាច់​ព្រ័ត្រេ​។ ​លោក​ ពេជ្រ ​សុផាន់ ​បន្ថែម​ថា ​ក្នុង​ចំណោមកីឡាករ​​ ៤​ នាក់ ​ដែល​ត្រូវ​ឡើង​ប្រ​កួត​នេះ គឺ​​លំបាក​ទស្សន៍​ទាយ​ឲ្យ​ច្បាស់​ណាស់​ពី​ព្រោះ​ជា​ប្រភេទ​កីឡាករ​ចិត្ត​ធំ​ហ៊ាន​ចូល​វាយ​ប្តូ​ដូច​គ្នា​ហេតុនេះ​បើ​​វាយ​ចូល​គោល​ដៅ​ពេញ​វា​ប្រឈម​ទៅ​នឹង​ស្រុត​ចុះ​ឬ​សន្លប់​ភ្លាមៗ​ក៍​ថា​បាន​ដែរ​។​ លោកថ្លែង​ថា​៖««ខ្ញុំ​រម្ពឹង​ឈ្នះ​៨០​ភាគ​រយ​ប៉ុន្តែ​​បើចាប់​ឆ្នោត​ប៉ះ​ធន់​ផានិត​ការ​ប្រ​កួត​គឺ​ចាញ់​ឈ្នះ​តឹង​តែង​ណាស់​គឺមាន​ទំនុក​ចិត្ត​ឈ្នះ​ត្រឹម​​៥០​ភាគ​រយ​ប៉ុណ្ណោះ​»។​

ចំណែក​ លោក​ ស៊ន​ អេលីត​ លើក​ឡើង​ថា​៖«កូនសិស្ស​ខ្ញុំ​អេលីត​ សេង​ហួរ ​ខ្ញុំ​មិន​ហ៊ាន​និយាយ​មុន​ទេ​ពី​ព្រោះ​កុំ​ឲ្យ​គេ​ថា​ខ្ញុំ​អួត​ប៉ុន្តែ​ជា​ទូ​ទៅ​កូន​សិស្ស​ខ្ញុំ​ឡើង​សង្វៀន​​ធានា​វ៉ៃ​អស់​ពី​សមត្ថភាព​សន្លប់​ចោល​មិន​មែន​ឡើង​រាំ​តាម​ចង្វាក់​ភ្លេង​ដូច​កូន​សិស្ស​គេ​ទេ​»។​ ទោះយ៉ាង​ណា​ក៍​ដោយ​​ លោក​ ហង្ស ​សឿន ​មិន​អាច​សុំ​សម្ភាស​បាន​ទេ ​ខណៈ​ដែល​កីឡាករ​ បាន ​លីម ​ជើង​ថ្មី​តែ​គេ​បាន​កត់​សម្គាល់​ថា​ឆ្នើម​ផង​ដែរ​។​

គួរ​រម្លឹក​ថា កីឡា​ករ​ជើង​ថ្មី​ទាំង ​៤ ​រូប ​មាន​គ្រូ​បង្វឹក​វ័យ​ក្មេង​ចំនួន​ ៣រូប​មាន ​ក្នុង​មាន​ ពេជ្រ​ សុផាន់​ ធន់ ​សុភា ​និង​ ស៊ន ​អេលីត ​សុទ្ធ​តែ​មាន​​ប្រភព​ចេញ​ពី​កីឡាករ​មាន​បទ​ពិសោធន៍​​ច្រើន​លើក​សង្វៀន​។​ ពួក​គាត់​បាន​បង្ហើប​ឲ្យ​ដឹង​ថា​ ​ការ​រៀប​ចំ​ប្រ​កួត​គួរ​តែ​ផ្តល់​ឱកាស​ឲ្យ​កីឡាករ​ក្មេងៗ​ឆ្នើមៗ​ ប្រកួត​ក្នុង​ព្រឹត្តិការណ៍​ធំៗ​ ដើម្បី​បន្ត​វេន​ជើង​ចាស់​មួយ​ចំនួន​ដែល​មាន​អាយុ​កាន់​តែ​ច្រើន​៕​

Loading...