គោជល់​បង្កើត​ព្រឹត្ដិការណ៍​សង្វៀន​ប្រដាល់​តាមខេត្ដជ្រើសរើស​ជើងឯកគុនខ្មែរ​វ័យក្មេង

718
លោក មាន សំអុល នាយកចាត់ការទូទៅ ភេសជ្ជៈគោជល់ប្រចាំកម្ពុជាក្នុងសន្និសីទសារព័ត៌មានបើកការប្រកួត «ដំណើរឆ្ពោះទៅតាមខេត្ដ» របស់គោជល់ម្សិលមិញ។ រូប ពូ នាង។

ភ្នំពេញៈ ភេជ្ជៈពូវកម្លាំង​ គោជល់ បាន​ផ្ដើម​រៀប​ចំព្រឹត្ដិការណ៍​សង្វៀន​ប្រដាល់​គុនខ្មែរនៅ​តាម​បណ្ដាខេត្ដ​មួយ​ចំនួន​នៅ​ប្រទេស​កម្ពុជាដដំបូងក្រោម​ប្របទ «ដំណើរឆ្ពោះទៅតាមខេត្ត» ដើម្បី​ស្វែង​រក​ជើង​ខ្លាំង​គុន​ខ្មែរ និង​ជើង​ឯង​គោគល់​ប្រចាំ​រដូវ​កាល​ឆ្នាំ ២០១៩។

លោក មាន សំអុល នាយកចាត់ការទូទៅ ភេសជ្ជៈគោជល់ប្រចាំកម្ពុជា បាន​ថ្លែង​ថា ព្រឹត្ដិការណ៍​ប្រដាល់គុនខ្មែរលើសង្វៀន​តាម​បណ្ដាខេត្ដ​នេះ រៀប​ចំឡើង​ក្នុង​គោល​បំណង​បង្កើត​ជាព្រឹត្ដិការណ៍​ប្រដាល់​ឲ្យ​ដល់​កីឡាករ​គុនខ្មែរ​នៅតាមខេត្ដ និង​អ្នក​គាំទ្រកីឡាគុនខ្មែរ​នៅតាម​បណ្ដាខេត្ដ​ឲ្យ​បាន​ទស្សនា​គ្រប់ៗគ្នា​តែម្ដង​។

លោក​ថា៖«ដូច្នេះ​អ្នក​គាំទ្រវិស័យ​កីឡាប្រដាល់គុនខ្មែរ អាច​មក​ចូលរួម​ទស្សនា និង​គាំទ្រកីឡាករ​របស់​ខ្លួន​បាន​នៅ​ក្នុង​ខេត្ដ​របស់​ខ្លួន​តែម្ដង​»។

សន្និសីទសារព័ត៌មានបើកការប្រកួត «ដំណើរឆ្ពោះទៅតាមខេត្ដ» របស់គោជល់ម្សិលមិញ។ រូប ពូ នាង។

លោក ហួរ រតនៈ ប្រធាន​ទីផ្សារ ទូរទស្សន៍ CTN បាន​ឲ្យដឹងថា ក្នុង​ព្រឹត្ដិការណ៍​ប្រដាល់​គុនខ្មែរ​លើ​សង្វៀន​ជនបទ​តាម​បណ្ដាខេត្ដ​​នេះ នឹង​មាន​ការ​ផ្សាយ​ផ្ទាល់​លើ​កញ្ចក់ទូរទ្សន៍ CTN ផងដែរ​។

លោក​បន្ដ​ថា​៖«ព្រឹត្ដិការណ៍​សង្វៀន​ប្រដាល់​តាម​បណ្ដាខេត្ដនេះ វាគឺជា​ឱកាស​ដ៏ល្អ​មួយ ដើម្បី​ផ្ដល់​ឱកាសដល់​កីឡា​ករ​គុនខ្មែរ​វ័យ​ក្មេង ដែល​កំពុង​លេច​ធ្លោ​នៅ​តាម​ខេត្ដ​ ឲ្យ​មាន​ឱកាស​បង្ហាញ​ពី​ទេព្យ​គោសល្យ​របស់​ពួកគេ​»។

ព្រឹត្ដិការណ៍​សង្វៀនប្រដាល់គុនខ្មែរទៅតាម​ខេត្ដ​ក្រោម​ពាក្យ​ស្លោក​ថា «ដំណើរ​ឆ្ពោះទៅតាមខេត្ដ» របស់​គោជល់នេះ នឹង​ផ្ដើម​ចេញ​ដំណើរ​ទៅខេត្ដ​ដែល​សម្បូរ​កីឡាករគុនខ្មែរ​ជាង​គេនៅកម្ពុជា គឺ ខេត្ដ​បាត់ដំបង កំពង់ស្ពឺ កំពង់ធំ និង​ខេត្ដ​កំពង់ចាម។ ព្រឹត្ដិការណ៍នេះ នឹង​បន្ដ​ប្រកួត​ផ្ដាច់ព្រ័ត្រដណ្ដើម​ខ្សែក្រវាត់​នៅ​រាជធានីភ្នំពេញ។

ព្រឹត្ដិការណ៍នេះ នឹង​ចាប់​ផ្ដើម​ដំបូង​នៅថ្ងៃទី ២៣ ខែកុម្ភៈ ឆ្នាំ ២០១៩ ក្នុងខេត្ដ​បាត់ដំបង និង​បន្ដទៅ​ខេត្ត​កំពង់​ស្ពឺ ​នៅថ្ងៃទី ៣០ ខែមីនា ហើយ​ខេត្ដ​ កំពង់ធំ នៅថ្ងៃទី ២៧ ខែ មេសា បន្ដទៅខេត្ដ​កំពង់ចាម នៅថ្ងៃទី ៤ ខែ ឧសភា ឆ្នាំ ២០១៩។ ព្រឹត្ដិការណ៍នេះនឹង​ផ្សាយ​បន្ដ​ផ្ទាល់​តាម​ទូរទស្សន៍ CTN ចាប់ពីម៉ោង ៥៖ ៣០ នាទីយប់ ដល់ម៉ោង ៨យប់៕

Loading...