កីឡាប្រដាល់ចាស់វស្សា៤រូបនឹង​ប៉ះគ្នានៅ​សង្វៀនថោនចុង​ខែវិច្ឆិកានេះ​

151
Four veteran boxers to meet at Town Arena.

ភ្នំពេញៈ កីឡាករ​ជើងចាស់ទម្ងន់ ៦៧គីឡូក្រាម ឆៃ សារ៉ា, មុត ខ្លឹមខ្មៅ, គឹមវាសនា និង មាស សុជាតិ នឹង​ប៉ះគ្នា​នៅលើ​សង្វៀន​ថោននៅ​ថ្ងៃទី​២៩ ខែវិច្ឆិកានេះ ដើម្បី​ប្រជែងយក​ប្រាក់រង្វាន់​​ ៣លាន ៤សែនរៀល។

តាមរយៈបទពិសោធន៍​ប្រកួត​ជាង ១០០លើក កីឡាករ​ទាំង​៤ កំពុង​រំពឹង​ទទួល​បាន​ប្រាក់​រង្វាន់​រៀង​ៗខ្លួន។ ប៉ុន្ដែ​ទោះបីជាយ៉ាងណា ក៏ឡាករ គឹម វាសនា មាន​បទពិសោធន៍​លើ​សង្វៀន​តិច​ជាង​គេ​ គឺ​ ៧២ លើក ក៏មាន​អារម្ភ​ភ័យ​ខ្លះដែរ​។

តាម​ការ​បង្ហាញ​របស់អ្នក​រៀបចំ​ការប្រកួតនេះ ​កីឡាករ​ទាំង​៤នឹង​ប៉ះ​គ្នា​ក្នុង​កម្មវី​ធី​ម៉ារ៉ាតុង ​នាយប់​ថ្ងៃអាទិត្យ​នៅ​សង្វៀន​ថោន។

កីឡាករ ឆៃ សារ៉ា ​និយាយ​ថា ​ឧបសគ្គ​ធំរបស់​គេ ​គឺ​ មុត ​ខ្លឹម​ខ្មៅ​ និង គឹម វាសនា។ ប៉ុន្តែកីឡាករ​ មុត ​ខ្លឹមខ្មៅ ​វិញថា ​ឆៃ សារ៉ា​ មិនមែនជា​​​បញ្ហា​​ទេ គឺ​ញ​ញើត ​តែ​ គឹម ​វាសនា ​ទៅ​វិញទោះបទ​ពិសោធន៍​លើសង្វៀន​តិច​ជាង​គេ​ក៏ដោយ​។ ប៉ុន្ដែ​ មុត ​ខ្លឹម​ខ្មៅ ​បាន រំពឹង​ ការ​ឈ្នះ​​ខ្ពស់ ​ពី​ព្រោះ​ការ​ហ្វឹក​ហាត់​បាន​ល្អ ​និង​ធ្លាប់​ស្គាល់​ពី​កម្រិត​បច្ចេក​ទេស​របស់ដៃគូទាំង ៣​រួច​ ហើយ​។

ចំណែក​ ឆៃ ​សារ៉ា ប្រាប់​ថា ​ក្នុង​ចំណោម​កីឡាករ​ទាំង​ ៣​នាក់នេះ កីឡាករ​ដែល​លំបាក​ឈ្នះ​នោះមា​ន ​គឹម វាសនា និង​ មុត ខ្លឹមខ្មៅ។  ចំណែក​កីឡាករ​ មាស សុជាតិ មិន​ជា​ឧប​សគ្គ​ធំក្នុង​ការ​យក​ឈ្នះឡើយ​។

ឆៃ សារ៉ា​ ប្រាប់ថា​៖«កាល​មុ​ន​ខ្ញុំ​ធ្លាប់​ឈ្នះ​ប្រាក់​ពីកម្ម​វិធី​នេះ​ម្តង​បន្ទាប់​ពីឈ្នះ​ កែវ សំរិទ្ធ នៅ​វគ្គ​ជម្រុះ និ​ង​ឈ្នះ​ គឹម វាសនា នៅ​​វគ្គ​ផ្តាច់​ព្រ័ត្រ​។ ខ្ញុំធ្លាប់​ឈ្នះ​ គឹម វាសនា ក្នុង​លក្ខណៈ​លំបាក​តឹង​តែង​ណាស់​ចំណែក​កីឡាករ​ មុត ​ខ្លឹមខ្មៅ ធ្លាប់ប៉ះ​គ្នា​ចំនួន ៥​ លើក​ចាញ់​៣ ​ឈ្នះ​២ លើក​សុទ្ធ​បែក​ឈាម​ទាំង​អស់​។​ ប៉ុន្ដែ​ទោះ​ជា​ឧបសគ្គ​ធំយ៉ាង​ណាក្តី​តាម​ការ​ប្រឹង​ប្រែង​ហ្វឹក​ហាត់​និង​តាំង​ចិត្ត​ប្រកួត​ ខ្ញុំ​រំពឹងយក​​ឈ្នះ​ពួកគេ​បាន​ ៦០ភាគ​រយ​»។

មុត ខ្លឹមខ្មៅ ប្រាប់​ថា៖«ខ្ញុំមានសង្ឃឹមឈ្នះ ៨០ភាគ​រយ។ ក្នុង​ចំណោមពួកគេ ​៣នា​ក់​នេះ ​កីឡាករ​ មាស​ សុជាតិ អាច​ស៊ី​ផុយ​​ ​ព្រោះ​ធ្លាប់​ប្រកួត​ជា​មួយ​ចំនួន ២លើក​ ខ្ញុំ​វ៉ៃ​ឲ្យ​សន្លប់ទាំង​២លើក។ កីឡាករ ឆៃ សារ៉ា ខ្ញុំ​ជួប​ប្រកួត​ ៥លើក​ឈ្នះ ៣ លើក​ចាញ់​ ២លើក​ និ​ង​កីឡាករ ​គឹម វាសនា ខ្ញុំវ៉ៃ​ឈ្នះ ១លើក​ចាញ់​ ២លើក»។

ខ្លឹមខ្មៅ​ បញ្ជាក់ថា ​ឧបសគ្គ​ធំ​សម្រាប់​គេ​​មិន​មែន ​មាស​ សុជាតិ និង​ ឆៃ សារ៉ា ទេប៉ុន្ដែ​គឺ គឹម វាសនា នេះតែម្តង។ ចំណែក គឹម វាសនា ដែល​ដៃគូខាង​លើ​សុទ្ធ​តែញ​ញើត​នោះ ​គឺ​មិន​បញ្ចេញ​ទស្សនៈ​អ្វី​ឡើយ​ដោយ​គេនិយាយ​ខ្លីថា៖«ខ្ញុំមិន​ហ៊ាន​ទស្សន៍ទាយ​ទេ។ ​ប៉ុន្តែ​ធានា​វ៉ៃ​ឲ្យអ​ស់​ពីលទ្ធ​ភាព​និង​ចង់​ឈ្នះ​រង្វាន់​ដូច​គ្នា»។

លោក ជួប វុត្ថា អ្នក​គ្រប់​គ្រង​និង​សម្រប​សម្រួល​កីឡាករ​ប្រកួត​ប្រចាំ​សង្វៀន​ថោន​ឲ្យដឹងថា​សមាស​ភាព​អ្នក​ប្រដាល់​ទាំង​ ៤​នេះ​ពិត​ជា​មាន​សមត្ថ​ភាព​ប្រហាក់​ប្រហែល​គ្នា​ហើយ​លទ្ធ​ផល​នៃ​ការ​ប្រកួត​ពិត​ជាលំ​បាក​ព្យាករ​ថា​នរណា​មាន​ប្រៀប​ជា​ង​នោះ​ណាស់​គឺអាស្រ័យនៅលើសង្វៀនផ្ទាល់តែម្តងនៅយប់ថ្ងៃអាទិត្យទី២៩ ខែវិច្ឆិកាឆ្នាំ២០២០នេះតែម្តង៕

Loading...