ស្ងាត់ៗកីឡា KickBoxing ត្រៀមបានល្អដើម្បីចូលរួមស៊ីហ្គេមលើកទី៣១ឆ្នាំ២០២១នៅវៀតណាម

105

ប្រភេទ​កីឡា​ប្រយុទ្ធ​មួយ​បែប​ដែល​លក្ខណៈ​ប្រកួត​ស្រដៀង​ទៅ​នឹង​ប្រដាល់​គុន​ខ្មែរ​ហើយ​កន្លង​មក​កីឡា​នេះ​ធ្លាប់​ជ្រក​ក្រោម​សហព័ន្ធ​គុន​ខ្មែរ​និង​ចេញ​ទៅ​ប្រ​កួត​នៅ​ស៊ីហ្គេម​លើក​ទី​៣០​ឆ្នាំ​២០១៩​នៅ​ប្រ​ទេស​ហ្វី​លីពីន​ឈ្នះ​មេដាយ​សំរិទ្ធ​ផង​ដែរ​។​យ៉ាង​ណា​ក៍​ដោយ​គិត​មក​ដល់​បច្ចុប្បន្ន​សហព័ន្ធ​​Kick Boxing ​បាន​កើត​ចេញ​ជា​រូប​រាង​ទទួល​ស្គាល់​ពី​ក្រ​សួង​អប់​រំ​យុវជន​និង​កីឡា​ក៍​ដូច​គណៈ​កម្មាធិការ​ជាតិ​អូឡាំ​ពិក​កម្ពុជា​រួច​ហើយ​ព្រម​ទាំង​មាន​រចនា​សម្ព័ន្ធ​ធន​ធាន​មនុស្ស​ល្អ​។​

បើ​និយាយ​ពី​ប្រ​វត្តិ​របស់​កីឡា ​​Kick​Boxing ​នេះ​កាល​មិន​ទាន់​បង្កើត​បាន​ជា​សហព័ន្ធ​ពេញ​លេញ​នោះ​ក្រសួង​អប់​រំ​យុវជន​និង​កីឡា​បាន​ផ្ញើរ​កីឡា​នេះ​ឱ្យ​នៅ​ក្នុង​សហព័ន្ធ​ប្រ​ដាល់​គុន​ខ្មែរ​ខណៈ​ដែល​ធន​ធាន​គ្រូ​បង្វឹក​និង​អត្តពលិក​បាន​ខ្ចី​ពី​ប្រ​ដាល់​គុន​ខ្មែរ​ទាំង​ស្រុង​។​​

ក្នុង​កិច្ច​សម្ភាស​តាម​ទូរស័ព្ទ​ជា​មួយ​លោក​ហេង​សុឃន​ដែល​បច្ចុប្បន្ន​ជា​ប្រធាន​សហព័ន្ធ​កីឡា​Kick​Boxing​កម្ពុជា​ឲ្យ​ដឹង​ថា​៖​សហព័ន្ធ​បាន​បង្កើត​ដោយ​មាន​ទទួល​ស្គាល់​ពី​ក្រ​សយង​អប់​រំ​យុវជន​និង​កីឡា​ព្រម​ទាំង​គណៈកម្មាធិការ​ជាតិ​អូឡាំ​ពិក​កម្ពុជា​។​ក្នុង​នោះ​ដែល​រចនា​សម្ព័ន្ធ​ការ​ដឹក​នាំ​សុទ្ធ​តែ​អ្នក​មាន​ជំនាញ​កីឡា​ហើយ​ជ្រើស​រើស​គ្រូ​បង្វឹក​វ័យ​ក្មេង​មាន​បទ​ពិសោធ​ន៍​ល្អ​អត្តពលិក​មាន​សមត្ថភាព​ពិសេស​ដើម្បី​ត្រៀម​ទៅ​ចូល​រួម​ប្រ​កួត​ក្នុង​ព្រឹត្តិការណ៍​កីឡា​ស៊ី​ហ្គេម​លើក​ទី​៣១​ឆ្នាំ​២០២១​ខាង​មុខ​នៅ​ប្រ​ទេស​វៀត​ណាម​។​លោក​ហេង​សុឃន​បាន​ឲ្យ​ដឹង​បន្ត​ថា​៖​សមាស​ភាព​ថ្នាក់​ដឹក​នាំ​របស់​សហព័ន្ធ​មាន​ឯក​ឧត្តម​តែម​ម៉ឺន​ជា​ប្រធាន​កិត្តយស​,ខ្ញុំ​(ហេងសុឃន​)​ជា​ប្រធាន​សហព័ន្ធ​,លោក​ម៉ិល​កាដូ​និង​លោក​ប៉ែន​កាត់​ជា​អនុប្រធាន​លោក​ជំទាញ​កែវ​ច័ន្ទមុន្នី​ជា​អគ្គ​លេខាធិការ​លោក​មេធាវី​ផែង​វណ្ណៈ​ជា​អគ្គ​លេខាធិការ​រង​និង​មាន​សមាជិក​ចំនួន​៥​នាក់​ទៀត​។​ចំណែក​គ្រូ​បង្វឹក​គណៈកម្មការ​បាន​សម្រិត​សម្រាំង​យក​ចំនួន​៤​នាក់​មាន​តី​១​លោក​ជា​រិទ្ធ​អត្តីតៈ​គ្រូ​ជម្រើស​ជាតិ​គុន​ខ្មែរ​ឆ្នាំ​២០២០​ជា​គ្រូ​ធំ​និង​គ្រូ​ជំនួយ​៣​នាក់​ទៀត​មាន​អតីតៈ​កីឡាករ​បីត​ខាំ​,សៅ​ប៊ុន​នឿន​និង​សាន់​សៅ​យ៉ាន់​។​

ទាក់​ទង​ទៅ​នឹង​សមាស​ភាព​អត្តពលិក​ត្រៀម​ហ្វឹក​ហាត់​លោក​ហេង​សុឃន​មាន​ប្រសាសន៍​ថា​៖​គណៈកម្មការ​បាន​សម្រេច​ជ្រើស​រើស​​យ៉ាង​ត្រឹម​ត្រូវ​មាន​ចំនួន​១២​នាក់​ក្នុង​នោះ​មាន​កីឡាការិនី​ចំនួន​៤​នាក់​បំរ៉ុង​ពីរ​នាក់​និង​កីឡាករ​ចំនួន​៦​នាក់​។​លោក​បាន​បដិសេធ​មិន​​អាច​បង្ហាញ​ឈ្មោះ​អត្តពលិក​បាន​ពី​ព្រោះ​កំពុង​រង់​ចាំ​ការ​ទទួល​ស្គាល់​ជា​ផ្លូវ​ការ​ពី​ក្រ​សួង​អប់​រំ​យុវជន​និង​កីឡា​សិន​។​លោក​បន្ថែម​ថា​យើង​មាន​ទី​តាំង​ហ្វឹក​ហាត់​មាន​សម្ភារៈ​ហ្វឹក​ហាត់​ល្អ​នៅ​ក្នុង​ស្តាដ​ចាស់​តែ​ម្តង​ប៉ុន្តែ​ដោយ​បញ្ហា​កូវីដ​១៩​ផ្ទុះ​ជា​ថ្មី​យើង​ផ្គាក​សិន​។​​

លោក​តែម​ម៉ឺន​ប្រធាន​សហព័ន្ធ​ប្រ​ដាល់​គុន​ខ្មែរ​និង​ជា​ប្រធាន​កិត្តយស​សហព័ន្ធ​Kick​Boxing​មាន​ប្រសាស​ន៍​ថា​៖​កន្លង​មក​កីឡា​ Kick​Boxing ​ត្រូវ​បាន​ក្រ​សួង​អប់​រំ​យុវជន​និង​កីឡា​ដាក់​ឲ្យ​នៅ​ក្នុង​ប្រដាល់​គុន​ខ្មែរ​ខ្ញុំ​ជា​អ្នក​គ្រប់​គ្រង​ហើយ​ចេញ​ទៅ​ប្រ​កួត​លក្ខណៈ​អន្តរជាតិ​ស៊ី​ហ្គេម​យើង​ដណ្តើម​បាន​មេដាយ​សំរិទ្ធ​កាល​ពី​ឆ្នាំ​២០១៩​នៅ​ប្រទេស​ហ្វី​លីពីន​។​លោក​តែម​ម៉ឺន​បន្ថែម​ថា​៖​ទោះ​បី​សហព័ន្ធ​ផ្សេង​គ្នា​ប៉ុន្តែ​យើង​នៅ​តែ​សហការ​គ្នា​ពី​ព្រោះ​របៀប​ប្រ​កួត​ក្តី​ធន​ធាន​កីឡាករ​ក្តី​គ្រូ​បង្វឹក​ក្តី​មាន​ប្រពភ​ចេញ​ពី​ប្រដាល់​គុន​ខ្មែរ​ប៉ុន្តែ​ក្បាច់​ប្រកួត​ខុស​គ្នា​បន្តិច​បន្តួច​ប៉ុណ្ណោះ​។​

នៅ​ក្នុង​អត្តពលិក​ចំនួន​១២​នាក់​ដែល​សហព័ន្ធ​មិន​ទាន់​ទម្លាយ​ឈ្មោះ​ជា​សាធារណៈ​នោះ​ប្រភព​ដែល​ភ្នំពេញ​ប៉ុស្តិ៍​ទទួល​បាន​មាន​វត្ត​មាន​របស់​កីឡាការិនី​ឆ្នើម​ម្នាក់​ជម្រើស​ជាតិ​ប្រដាល់​សកល​នៅ​ស្រី​ពៅ​សម្រេច​ចិត្តឈប់​ពី​ប្រដាល់​សកល​​ទៅ​ហាត់​នៅ​សហព័ន្ធ​Kick​Boxing ​វិញ​ដោយ​សង្ឃឹម​បាន​ចូល​រួម​ប្រ​កួត​ឈ្នះ​នៅ​ឆាក​អន្តរជាតិ​។​

នៅ​ស្រី​ពៅ​និយាយ​ថា​៖​ខ្ញុំ​ជាប់​ជា​ជម្រើស​ជាតិ​ប្រ​ដាល់​សកល​ចំនួន​៣​ឆ្នាំ​ប៉ុន្តែ​ពេល​នេះ​ខ្ញុំ​សម្រេច​ចិត្ត​ចូល​ហាត់​នៅ​ សហព័ន្ធ​Kick​Boxing ​វិញ​ដោយ​មើល​ឃើញ​ថា​មាន​លទ្ធភាព​ប្រ​កួត​ប្រជែង​លើ​ឆាក​អន្តរជាតិ​បាន​។​«​ខ្ញុំ​ធ្លាប់​វ៉ៃ​ក្នុង​កីឡា​ប្រយុទ្ធ​មាន​ចេញ​ដៃ​ចេញ​ជើង​គឺ​សង្ឃឹម​ថា​ល្អ​ជាង​ប្រដាល់​សកល​ហើយ​ខ្ញុំ​បាន​សុំ​ទៅ​មេ​ហើយ​គាត់​បាន​អនុញាតិ​រួច​ហើយ​»​។​

គួរ​រម្លឹក​បញ្ជាក់​ថា​លោក​ហេង​សុឃន​បាន​ហក់​ចូល​ក្នុង​វិស័យ​កីឡា​ប្រដាល់​បាន​ជាង​៥​ឆ្នាំ​បាន​លះ​បង់​ពេល​វេលា​និង​ថវិកា​ផ្ទាល់​ខ្លួន​ជា​ច្រើន​ក្នុង​ការ​ជួយ​ឧបត្ថម្ភ​សហព័ន្ធ​ប្រដាល់​គុន​ខ្មែរ​ជា​បន្ត​បន្ទាប់​លោក​ត្រូវ​បាន​គាំ​ទ្រ​ជា​អនុ​ប្រធាន​សហព័ន្ធ​គុន​ខ្មែរទទួល​បន្ទុក​ជួយ​ឧបត្ថម្ភ​​ហើយ​បច្ចុប្បន្​លោក​ត្រូវ​បាន​បន្ថែម​ជា​ប្រធាន​ សហព័ន្ធ​Kick​Boxing ​មួយ​ទៀត​៕​

Loading...