កីឡាករចំនួន ៦៤នាក់បានចូលរួមប្រកួតប្រជែងជើងឯកថ្នាក់ជាតិកីឡា​អុកចត្រង្គឆ្នាំនេះ

132

កីឡាករចំនួន ៦៤នាក់ មកពី ១៧ក្លឹបនៃរាជធានី-ខេត្តនានា បានចូលរួមប្រកួតប្រជែងជើងឯក នៅក្នុងការប្រកួតកីឡា​អុកចត្រង្គ ជ្រើសរើសជើងឯកថ្នាក់ជាតិ ប្រចាំឆ្នាំ២០២០ ដោយបើកការប្រកួតនៅព្រឹកថ្ងៃអង្គារ ទី ៥ រហូតដល់ថ្ងៃទី ៧ ខែមករា ឆ្នាំ២០២១ នេះ នៅក្លឹបសេះខៀវ រាជធានីភ្នំពេញ។

យោងតាមរបាយការណ៍សហព័ន្ធកីឡាអុកចត្រង្គកម្ពុជាបានឱ្យដឹងថា កីឡាករដែលចូលរួមចំនួន ៦៤ នាក់នេះ មកពី ១៧ក្លឹប ដោយ ៧ក្លឹប មកពីខេត្តចំនួន ៧ និង ១០ក្លឹប ទៀតនៅរាជធានីភ្នំពេញ ក្រោមការរៀបចំដោយសហព័ន្ធ​កីឡាអុកចត្រង្គកម្ពុជា និងទទួលបានថវិកាគាំទ្រពីក្រសួងអប់រំ យុវជន និងកីឡានៃគម្រោងថវិកា ៣មុខសញ្ញា គឺរដ្ឋបាល ២០ភាគរយ ការបណ្តុះបណ្តាល ៣៥ភាគរយ និងការប្រកួត ៤៥ភាគរយ។

សហព័ន្ធបានចាត់ទុកថា ការប្រកួតនេះពិតជាមានសារៈសំខាន់ណាស់ ក្នុងការពង្រឹង និងលើកស្ទួយវិស័យកីឡាអុកចត្រង្គ ដែលជា​កេរមរតក​ដូនតាខ្មែរ ដើម្បីបន្តការអរិរក្ស និងអភិវឌ្ឍន៍ប្រភេទកីឡាប្រពៃណីវប្បធម៌ជាតិមួយ​នេះទាំងថ្នាក់ជាតិ ក៏​ដូចជាអន្តរជាតិ ជាពិសេសគឺសម្រួចគោលដៅឆ្ពោះទៅទទួលធ្វើជាម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជាផងដែរ។

នេះជាលើកទី៣ ដែលសហព័ន្ធ​បាន​រៀបចំការប្រកួតជើងឯកថ្នាក់ជាតិនេះឡើង ចាប់តាំងពីសហព័ន្ធត្រូវបានបង្កើតឡើងជាផ្លូវការ ចាប់តាំងពីឆ្នាំ២០១៧ មក៕

Loading...